డెకాయిట్: డూప్ లేకుండా అడివి శేష్ రిస్కీ స్టంట్స్! రేపు థియేటర్లలో 'డెకాయిట్' రచ్చ.. కారు డ్రిఫ్టింగ్ సీన్లు మామూలుగా లేవుగా!

డూప్ లేకుండా అడివి శేష్ రిస్కీ స్టంట్స్.. 'డెకాయిట్' కార్ ఛేజ్ సీన్లు అరాచకం!

టాలీవుడ్ యంగ్ అండ్ టాలెంటెడ్ హీరో అడివి శేష్ నుంచి సినిమా వస్తుందంటే చాలు, అందులో ఏదో ఒక కొత్తదనం ఉంటుందని ప్రేక్షకులు ఆశిస్తారు. దానికి తగ్గట్టే ఆయన నటించిన లేటెస్ట్ యాక్షన్ థ్రిల్లర్ ‘డెకాయిట్’ రేపు (ఏప్రిల్ 10న) థియేటర్లలోకి రాబోతోంది. షనీల్ డియో దర్శకత్వం వహించిన ఈ సినిమాపై ఇప్పటికే భారీ అంచనాలు ఉన్నాయి. ముఖ్యంగా ఈ సినిమాలో వచ్చే యాక్షన్ సీక్వెన్సులు ప్రేక్షకులకు గూస్ బంప్స్ తెప్పించడం ఖాయమని చిత్ర యూనిట్ నమ్మకంగా చెబుతోంది.

ఈ సినిమాలో కార్ ఛేజింగ్ సీన్లు సినిమాకే హైలైట్‌గా నిలుస్తాయట. సాధారణంగా ఇలాంటి రిస్కీ షాట్లకు డూప్‌లను వాడుతుంటారు, కానీ అడివి శేష్ మాత్రం ప్రామాణికత కోసం స్వయంగా రంగంలోకి దిగారు. ఎంతో రిస్క్ అని తెలిసినా డూప్ లేకుండా కార్ డ్రిఫ్టింగ్ సీన్లలో నటించి అందరినీ ఆశ్చర్యపరిచారు. ఈ అనుభవం గురించి శేష్ మాట్లాడుతూ, ప్రొఫెషనల్ గేర్ వేసుకుని, భద్రతా ఏర్పాట్ల మధ్య కారును డ్రిఫ్టింగ్ చేయడం చాలా థ్రిల్లింగ్‌గా అనిపించిందని చెప్పారు. ఇది రోజూ చేసే పని కాదని, అందుకే ఆ కిక్కు వేరేలా ఉందని ఆయన చెప్పుకొచ్చారు.

యాక్షన్ సీన్ల చిత్రీకరణ సమయంలో రీటేక్‌లకు అస్సలు అవకాశం ఉండదని, ప్రతి మలుపును ఎంతో జాగ్రత్తగా ప్లాన్ చేస్తారని శేష్ వివరించారు. ఒక్క టేక్‌లోనే షాట్ ఓకే చేయాలనే కసితో పనిచేశానని, దర్శకుడు అనుకున్న అవుట్‌పుట్ వచ్చినప్పుడు కలిగే సంతృప్తి మాటల్లో చెప్పలేనని ఆయన అన్నారు. ఈ సినిమా కథ విషయానికి వస్తే.. ప్రేమించిన అమ్మాయి చేసిన మోసం వల్ల, చేయని నేరానికి జైలు శిక్ష అనుభవించిన ఒక వ్యక్తి కథగా తెలుస్తోంది. ఇందులో మృణాల్ ఠాకూర్ హీరోయిన్‌గా నటిస్తుండగా, బాలీవుడ్ ప్రముఖ దర్శకుడు అనురాగ్ కశ్యప్ ఒక పవర్‌ఫుల్ పాత్రలో కనిపించనున్నారు. యాక్షన్ సినిమాలను ఇష్టపడే వారికి రేపు ‘డెకాయిట్’ ఒక మంచి ట్రీట్ అని చెప్పొచ్చు.