ఆకాశంలో అద్భుతం: టిబెట్ ఆకాశంలో మెరిసిన అత్యంత అరుదైన ‘రెడ్ స్ప్రైట్స్’.. అస్సలు ఇవేంటో తెలుసా?

ప్రకృతి ఇచ్చే ఆశ్చర్యాలకు అవధులు లేవు అనడానికి తాజాగా టిబెట్ ఆకాశంలో జరిగిన ఒక ఘటనే నిదర్శనం. రాత్రి వేళ ఆకాశంలో జెల్లీఫిష్ ఆకారంలో, భారీ ఎరుపు రంగు కాంతి స్తంభాలు ఒక్కసారిగా మెరిసి మాయమయ్యాయి. సైన్స్ భాషలో వీటిని ‘రెడ్ స్ప్రైట్స్’ (Red Sprites) అని పిలుస్తారు. అత్యంత అరుదైన ఈ దృశ్యం ఇప్పుడు సోషల్ మీడియాలో విపరీతంగా వైరల్ అవుతోంది.

అస్సలు ఇవి ఎందుకు వస్తాయి? సాధారణంగా మనకు కనిపించే మెరుపులు భూమి వైపు లేదా మేఘాల మధ్య వస్తాయి. కానీ, ఈ ‘రెడ్ స్ప్రైట్స్’ దానికి పూర్తిగా భిన్నం. ఇవి భూమికి దాదాపు 50 నుండి 90 కిలోమీటర్ల ఎత్తులో ఉండే మెసోస్పియర్ (Mesosphere - వాతావరణం పైపొర) లో ఏర్పడతాయి.

సైన్స్ వెనుక ఉన్న రహస్యం: భూమిపై తీవ్రమైన ఉరుములు, మెరుపులతో కూడిన భారీ తుఫానులు సంభవించినప్పుడు వాతావరణంలో విద్యుత్ శక్తి (Electrical Activity) విపరీతంగా పెరుగుతుంది. ఈ శక్తి వాతావరణం పైపొరల్లోని నైట్రోజన్ వాయువు పరమాణువులను ఉత్తేజితం చేస్తుంది. ఆ సమయంలో నైట్రోజన్ ప్రతిచర్య చెంది ఇలాంటి అద్భుతమైన ఎరుపు రంగు కాంతులను విడుదల చేస్తుంది.

ఇవి కేవలం కొన్ని మిల్లీసెకన్ల పాటు (సెకనులో వెయ్యో వంతు కాలం) మాత్రమే మెరిసి మాయమైపోతాయి. కాబట్టి వీటిని సాధారణ కంటితో చూడటం చాలా కష్టం. టిబెట్ పీఠభూమి భూమికి చాలా ఎత్తులో, స్పష్టమైన ఆకాశాన్ని కలిగి ఉండటం వల్ల అక్కడ ఉన్న హై-స్పీడ్ కెమెరాల్లో ఈ అద్భుత దృశ్యం రికార్డ్ అయింది. ఈ సైన్స్ వింతను చూసి నెటిజన్లు సైతం నోరెళ్లబెడుతున్నారు.

Extremely Rare Red Sprites Spotted Flashing Over Tibet. They are caused by high levels of electrical activity and form in the upper atmosphere during powerful thunderstorms. pic.twitter.com/ZKy4mDORvv — Aditya Raj Kaul (@AdityaRajKaul) June 3, 2026